From Joseph:

Then, tae mark his promotion,
The king took a notion
Tae gie Joe some presents an things.
So he goat him rigged oot
In a new three piece suit
An gied him some real diamond rings.

An a team o chaffoors
Fur tae take him oan tours
In a chariot, built like a Rolls,
An the final acclaim
O his newly found fame -
A folder wi Filofax scrolls!

From David & Goliath:

So aff Dave went tae battle
No quite armed tae the hilt,
Fur he only took his shepherd's stick,
An his favourite catapult.

An oot came big Goliath
Tae say his usual bit,
But when he saw wee Davie, well,
He nearly hud a fit!

An he yelled across the valley:
'Ur ye trying tae take the Mick?
Is this the best that ye can send?
A laddie wi a stick!'

From Samson:

His 'Mister Universe' physique
Made aw the other laddies seik,
An say some unkind words.
Fur Samson showed tae wan an all
That, even tho ye're no too tall,
A chest the size o' Kelvin Hall
Just fairly pulls the burds!

From Moses:

An finally God gave a precis,
By combinin them aw intae ten,
So everywan hearin them may see
How the Lord God related tae men.

An, since Moses wis clearly desirous
Fur a copy, tae help make them known,
God inscribed them - no oan papyrus -
But carved oot in tablets o stone!

It's no quite just how ye might plan it,
Fur a person's just apt tae drap deid,
If ye hud tae humph cart-loads o granite
Every time that ye wanted a read!