LÖF E TELEGRAM
Back ] Up ] Next ]

 

FA HOLGER DRACHMANN

In zifil, nilü pof in domil nulik ko stonatridem bäldik, älödom nafadugan - käpten, kel pänemom fa lumot e lufat - "Anton".

At äbinon *länem omik; äbinom ye nemükikum ka nems "Olsen" u "Kristoffersen" ; ibo in zifil nafans mödikum äbinons ko nems at - e ats no pänemoms käptens.

Lufat pänemom fümiko "Mikkelsen" ; ab dilo äpenom "Michelsen", e dilo äbinom konsulan - e zu konsulan Fransänik.

No bi äspikom u äpenom püki at; te badiko äkanom penön Däna- püki. Ab äbinos zesüdik, das älaboy in zifil konsulani Fransänik, äs älaboy konsulani Brasilänik e konsulani Türkänik - kels i no äsevoms pükis at; e ven cal ävedon vagik, älofoy ati söle bäldik "Michelsen" , ed älensumom oti nen dods; ibo in yels mödik no ilogoy nafi Fransänik in pof, sesumü balna, ed äsagoy, das at äbinon Suomiyänan, kel itovom lestäni oka dobiko.

In jolaziläks plödü zifil semikna piperon naf, kel ba päduton lü net pleidik bevü "Rhin" e Latlantean , ab nafapers at kösömo äbinons, ma sot

läbik jola, so lölöfiks, das tefü nem e lom älabon bevüspad veütikün pro niludams; ed äniludoy ai, das äbinon naf Svedänik u naf Deutänik.

Nets bofik at älabons konsulani in zifil, e bi balid äbinom Svedänan penintevöl, e telid äbinom man fogolöl de "Rostock", kludo püks in jenets at no äneletons konsulanabüsidi.

Benö ! konsulan "Michelsen" älabom dauti, kel pämatirajanof ko käpten - ye ün tim et - nafadugan "Anton".

Jimatan konsulana äniludof ti, das äbinos utos, kelos änemoy fedi

nepötöfik.

Konsulan bäldik äbinom man balik, igo vemo balik, kel as dünan yunik ikömom lü zifil se pädän nilik seimik, ätävom dü tim anik ko nafil, täno ivedom büsidan, ed idagetom ün tims gudik - sagoy, das vöno tims gudik edabinons - moni dub sel boada, blöba e fitas sigik.

In bäld lätikum imatom ko viudani yunik se cifazif. Matan ofa ibinom in cal gretikum in zifanamilit, e reto kura-bösinatedan regik. Älifom vemo in <klub vönik rega>, ed us i ädeadom; ans sagons, das ädeadom demü lufidam, e ans äniludons, das ädeadom demü tataludun; ab binos fümik, das ädeadom pos bal lefidas mödik ün tim et, ba äs "Madsen famik".

Jiviudan ägerof nosi - sesumü nem; e at soaliko no äkanon nulüdön ofi, patiko demü cänapeneds badik. Läbiko i no ägerof cilis.

In jiyunanüp oka ilärnof kukakani in kuköp rega; nu ägegolof lü flens usik oka; äbinof vo nog yunik, plitik; älabof logabobis gretik e flekikis, e in kondöt äbinof fümik - utos, kelos äplidos.

Is in kuköp rega nu ägetof cali gudik.

Dü büsidatäv lü cifazif, tedan "Michelsen" älogom ofi. Ägetof fümi tefü gud lada omik, e täno äsukof omi as jimatan oka.

Pos yels tel ämotof cili - dauti.

Moted ibinon fikulik. Jipulil äbinof zadik e fibik. Sanans tel zifila änedoms kani lölik okas ad savön lifi cilila. Ab lifi ädakipof, e täno pämatirajanof ko nafadugan "Anton".

konsulan - das in nem pätuvon Fransänapük. Nem ämebon dö "Omelette" e "Ninette" .

Das äzädoy jipulili, no äbinos nekösömik. Cils val pazädons - patiko, ven te laboy cili bal. Klien in mod e in vemöf.

Ab päzädof levemiküno.

Äglofof, binof smalik e vemo keinik, no malädöfik - tadilo äsagom sanan - ab äbinof zadik.

Ätidoy pianiko ofe ad brodön nemi in pokasärvätül e ad gifön vati ini tiedaskal. Latikumo älärnof dub virgan bäldikum Deutänapüki - sesumü gens; va no äbinos stimik e va äbinos tu fikulik, no nolob; ven konsulan ivedom verato konsulan, älärnof i Fransänapüki nemödik; e zu älärnof ad pianodön e kanitön kanitis nefikulik.

Ägetof lölo dugäli kudik; ed änolof atosi, pato bi ämeboy ofi ...

<O Bolette, cil löfik oba !" äsagof mot, kel ün yels lätik ivedof pinädik, <binos zesüdik, das meditobs dö fütür olik; ibo jiyunan ko dugäl ut, keli egetol . . . . . >

E so äjenos, das pämatirajanof.

Ibinosöv pro jimatan konsulana jok badik, keli ba no ikanof sufön, if no büo jok votik ijenon.

Ye no sunädo. Balido päblunedof.

Blunedazäl päzogon lunüpo. Ven äjinos fümik, das jipulil älifoföv, täno äprimoy ad bespikön nemi ofik.

<Binos zesüdik, das panemof "Bolette" - so pänemof jiter edeadöl obik, kel älöfof obi so vemo, ven äbinob yunan> äsagom konsulan.

<Nesiämö! so nemolös ofi vilikumo "Kesten" u "Sidse Malene" , nems at binons leigiks !> jimatan konsulana äsagof.

Ab to taspiküls zilik jimatana ädakipof ye nemi "Bolette".

Benö ! pänemof "Bolette", e mot ofik äkösömikof ad nem at; sevabo äniludof latikumo - äbinos ün tim et, ven matan ofa ävedom konsulan - das in nem pätuvon Fransänapük. Nem ämebon dö "Omelette" e "Ninette" .

Das äzädoy jipulili, no äbinos nekösömik. Cils val pazädons - patiko, ven te laboy cili bal. Klien in mod e in vemöf.

Ab päzädof levemiküno.

Äglofof, binof smalik e vemo keinik, no malädöfik - tadilo äsagom sanan - ab äbinof zadik.

Ätidoy pianiko ofe ad brodön nemi in pokasärvätül e ad gifön vati ini tiedaskal. Latikumo älärnof dub virgan bäldikum Deutänapüki - sesumü gens; va no äbinos stimik e va äbinos tu fikulik, no nolob; ven konsulan ivedom verato konsulan, älärnof i Fransänapüki nemödik; e zu älärnof ad pianodön e kanitön kanitis nefikulik.

Ägetof lölo dugäli kudik; ed änolof atosi, pato bi ämeboy ofi ...

<O Bolette, cil löfik oba !" äsagof mot, kel ün yels lätik ivedof pinädik, <binos zesüdik, das meditobs dö fütür olik; ibo jiyunan ko dugäl ut, keli egetol . . . . . >

E so äjenos, das pämatirajanof.

Ibinosöv pro jimatan konsulana jok badik, keli ba no ikanof sufön, if no büo jok votik ijenon.

No kanoy dagetön valikosi in vol at dub konsulanatiäd - so äjenos ba in tims repüblikänas bäldik. Ko tiäd Fransänik atimo - in zifil, in län smalik - no nämükon kredi oka, e <Mikkelsen> äbinom päridikan baik.

Tims vönik gudik efegolons; tims nulik äbinons badiks; prinsips pro ted e kondöt pivotikons. Ba prinsips bäldik at äbinons kalieta vemo gudikum, ab alo: no plu äkanons pagebön. Konsulan pätädom vemo, e stüm omik in zifil ädison.

E ven konsulan <Michelsen> no plu äbinom man stümikün zifila, täno äjenos, das nafadugan <Anton> äprimom ad plöpön.

Äbinom cil palas pöfik.

Ikömom ini naf e pivobom us so lunüpo jüs stimasen ipubom. Ävilom meritön nulüdi oka äs men snatik, ab no ävilom patölatön äs dog. Täno ilüvom nafi ed igolom ini län, ikolkömom mani benodälik, kel iyüfom omi konfidü tälens e kalad, kelis äblufom, e pul ivedom man skilik, e nu ikömom isio lü zifil ed ävegom as disanafadugan in bal nafas gretikum, kels ävegons lü läns lovemelik.

Suno plöpom so gudiko, das ävedom nafadugan balid in naf, ed äjuitom konfidi lölik käptena ed i uti nafalabana, kel no voto ätölatom menis ko spal.

Hiel <Anton> äbinom man yunik e jönik; atos yufos vemo.

So du nifüp in sogs anik ed in klubaledanüd ilogom vomüli <Michelsen>.

Zadik e keinik, legudik in danüd, herem blonik, logs gretik, kels äkanons vedön vemo fleniks e nidiks, - zu nam smalik in gluf redik ed i fut smalik in stog redik, kel äpubon ed änepubon dis klot - glät ko vin, kel nefädo päsemufulükon sui klot ofik bü tabadanüd, säkusads demü atos: "A ! no glifolös dö atos ! " - e lad nafadugana pifanon.

Älöfom ofi; ämatabegom ed ägetom gepüki : "si".

Vomül <Bolette Michelsen> pimatarajanof ko nafadugan <Anton>! Atos äbinos jenot lebalik e vero gretik mula, e kludo no äspikoy dö votikos in zifil.

Äkagoy. E mot ofik no äbinof ut, kel äneletof givön kage at nulüdi: läd so visedik e so stimadigik änolof fümiko, das in tefs valif ädunof gönü ok it e daut oka, ven änunof numi utas, kelis ökanof elabön as lüsonis.

If sötoy falön, viloy ye falön ko glor - äs cifs bäldik, kels nemuiko äkesumoms taanis mödik in dead; dö atos vom konsulana ililof dü spikäds seimik.

Das no ätadunof kelosi ijenos, ba äkanos paplänön dub stad konsulana.

Ven nafadugan yunik, ko dredäl gretikum ka ai, äkömom in bür privadik konsulana ed änunom vipi oka, täno konsulan äsumom pokasärvätüli no Fransänik se gun bäldik oka, äseitom nam okik ko drem fibik sui jot dremöl lüsona fütürik oka ed äsagom ome ko vög takedik :

"Nolob, das binol man ritik e dunik; ko fred givob ole dauti oba, e God benedomös olis; ab ün fütür osagob ole: Te mütol lekonfidön oli it. If ba no binob man penosüköl, ed if ba no ogolob ini sep obik as man snatik, so kanob te pos pers lätik, kelis esufob, dajonön obi us as man pöfik. Ab begob oli ad no sagön otosi menes votik."

Täno nafadugan ipedom nekösömiko fimiko nami konsulana ed imürom vödis nelelilovik anik, e poso konsulan ko logod smililöl ibegom ome ad golön lü läds.

Kludo ägolom lü vom okik e lü daut ofa.

Yels mödik ipasetikons sis lümot idrenof - äsagoy, das no idrenof ün yels teldegvel - ven kura-bösinatedan regik päsepom. Nu ädrenof, bi läds nolofs, das kanoy sufön valikosi dub drens - ven pagebons ko täm.

Sekü atos, i daut ofa ädrenof.

So nafadugan ästanom us, ba pekofudöl demü drenam.

Lif oma fümiko pidedieton pro luim, ab äbinos su nafadäk, das kösömo

äkomipom ta rein luimik. Lustom ut, keli ispetom ad getön de konsulan bäldik inepubon ed ivedon stom lejönik.

Kitim rein at änepubonöv-li ?

Rein läto äfinikon; sol äpubon.

Täno vom konsulana ävipol logedön onis ven äkidom dauti ofa. Ed äkidom ofi ko neskil e kofudam lönik komü lümot. Id ävipof, das ogolonsöv kobo su cemaglun. Älogedof onis ko fred, e valikos äfinikos in ladäl teik.

Täno ävisitof famüli oka.

Dub atos lukagam pästopon dü tim anik.

Vomül <Bolette> älifof äs fit in vat, e lümot ilensumof cali ut, kel binädon me simulön peläsetöli e pardonöli otüpo; stimadig motik, kel payokon xame, e löf motik, kel vipon setirön gudikosi se din, kel no kanon pavotön.

"Ag; cil löfik, löfof omi so vemo, e dido, binom vo man jönik e brafik, e ven no ovedom käpten . . . . . . . !" So äsagof ai.

Täno dugan nafa seimik ävedom malädik, ebo ven igetom fledi legudik ed änafom.

Äbinom man yunikum e nepematöl, ko kel <Anton> äbinom kompenan. Nafalaban äsäkom nafadugani <Anton>, va övipom lensumön cali nafadugana malädik.

Tävazeil äbinon zif <Lisboa>; äbinos zesüdik, das nafam pämekon spidiko, de atos monagaenät äsekidon.

Äbinos stimakomit e lof frutik. Ven nafam öplöponöv, äkanom nefikuliko sagön kludis: calamostep e mated sunik pos geköm.

Nafadugan <Anton> äbinom lefredik. Äspidom lü vomül <Bolette> ad nünön ofe nüni läbik at.

Ab äjinos bosi, kelosi no ispetom.

Daut sa mot okik äsagofs, das no ösufofs, das öjenos. So ün tim balid matirajana, himatirajanäb <omogolom> - leno !

Ätaspikom notodi <mogolön>; äplonom, äbegom ed äplekom - e fino äbinom fefik.

No iniludom, das jimatirajanäb jönik e löfik oka öbinof so zadik e so nesiämik.

Ädrenom, äbegom, ämürom. Vüo nafadugan dönu äsäkom söli <Anton>, va övipom lensumön komiti, u no.

Glumiko lüson ägolom lü söl bäldik <Michelsen>.

Binos zesüdik, das monafol; natiko ! Ospikobsös lädes !

Atos äyufos.

Ab ogödelo, ven nafadugan <Anton> ämotävom, lümot no äbinof flenöfik.

Logs jönik vomüla <Bolette> äbinons esvelöls demü drenam, ed ämoflekof logodi oka, ven äkidom ofi lätikna.

Veräto älepidof poso ed ägolof po om donio tridem to taspik mota okik; at täno äbinos tu läto. Leyan pikikon pos om; e zu - ko logs pesvelöl no äkanof pubön in süt u len pof - !

Änafom so spidiko, das nafadünanef ästunon; e ven balan nafanas ämürom demü atos, nafadugan yunik äflapom omi, so das äfalom sui nafateg.

Äbinos balidna, das nafadugan <Anton> iflapom eki.

Nilü pofazif <Dover> bot, kel äblinon penedis lü län, änilikon. Nafadugan <Anton> ibinom in nafacem oka dü düps tel, ed us ipenom penedi lunik. Ägivom oti it bötane, kel ägetom fladis tel konyaka - pla te bali - ed otüpo ägetom büdi: no glömolöd ad blinön penedi at lü potabür. "Opotob oni, ob it, maleditolöd oli,, o käpten ! ! " äsagom bötan ed äkidom leplütiko penedi büä äseitom ati in yäkapok legretik oka.

Poso änafom föfio dönu.

Nafam äbinon vifik e läbik, e klud äbinon, das nafalaban ägivom lofi frutik söle <Anton>, ven igekömom. Ab nafadugan yunik äniludom dilo, das no ökanom lüvön nafalabani votik e dilo no ävipom dagetön gaenäti dämü kompenan malädik oka.

Nafalaban älobom tikodi söla <Anton>, e nu älofom ome nafön nog te balna. Dönu <Anton> övedom dugan nafa otik, ed atna önafom lü Zänodamel, ed älonoy, das matam öjenon po geköm omik.

Büä ämonafom, ijenon rekosilakolköm gamas.

Vomül <Bolette> äkidof omi sunädo, e no ädälof, das äplänom. Äsumof penedi lunik oma ed äreidof oti. Du kids mödumik e du drens anik äbegof pardi ome.

Ipardof omi !

Binos so plitik ad pardön. Fümo no ikredom, das atos ivedos sek peneda lunik. Ipenom bo vödis mödik dö löf zadik oka, ab id ipenom konsälis fefik. Ab konsälis valik at no ävilof reidön, e ven <Anton> ästopom in pened ad bespikön onis, äkidof omi su cig, su flom e su mud - e täno äpardof omi.

Täno ädunom äs neai idunom büo: äloenom moni. Äbinos zesüdik, das äremom matablimi, bi söl bäldik <Michelsen> idotom ed isagom, das no ökan- omöv givön daute oka matalegivoti votik, ka benedi.

Nafadugan läbik ba no iniludom, das lüfat äbinom so pöfik, ab äbinom ye läbik; äbonedon matanotami lä pädan, e kludo äbinos zesüdik, das mata- blim pömekon.

Äjinos, das pesuädom, das i täv öplöpomöv ad gepelön debi oka, ven igekömom. Ibo ävilom, das matablim öbinonöv <nedebik>.

Kludo ägivom vome konsulana e vomüle <Bolette> däli zesüdik ad remön dinis zesüdik, - e täno ämonafom dönu.

I atna äspidom vemo, ed ästopom dönu nilü <Dover> ad givön penedi bötane, kel ye atna te ägetom fladi bal konyaka. Ibo pened no äbinon so lunik; no äbinos zesüdik, bi nu suno ägekömomöv.

Stomi lejönik e vieni gudik älabon naf du täv. Änakom ä in <Malaga> ä in <Messina>, e su nafateg ädrinom ä vini Spanyänik ä vini de <Marsala>; e täno äspidom lomio; e <pepolöl fa flitäms levipa> käpten änafom lü jigam e matam okik.

Dönulogam läbik, ven igekömom; fred e kids e smils e solanid. Te lefog nemödik; äbinos demü *matablim, kel ifrädon tu mödo; ab lümot äsagof, das no äkanoy *spälön pötü matam.

Benö ! Gam yunik, pespalöl fa plaks biedik vola, no ävilom ün del bü matam okik mekön tapükis fefik (e ye vaniko) demü dins somik, kels ye ogretükons koveni loma; ab *matablim no ävedon <nedebik>.

E poso matam äjenon.

Iväloy zenodadini bevü said tu mägik e lumagif tu gretik; äbinos zesüdik, das nek päskanon (pato prünans konsulana), e ye äbinos zesüdik, das dig päkonsefon. Käpten äniludom ye, das vilikumo äkanoy binön mägik, ibo pelots äbinons so gretiks. Ädureidom dü göd nogna monazötis ko glum gretik, bi so mödiks pinepelons.

Äklotom oki ko gun blägik, nulik, keli skrädan gudikün in <Messina> inägom pro om, e kel nog älabon smeli flifik de melavat. Älogedom oki it in lok. Gun äseadon lejöniko; äkanom binön kotenik. Läds valik, gretiks u smaliks, jöniks u nejöniks, yuniks u bäldiks älesagofsöv, das söl <Anton> äbinom <man jönik>.

E ye nafadugan äseifom. Nesuemik ! Äbinom nilü pof läba; us lom lejönik e vom löfik äspetons omi, ed aneito ölabedomöv dilis bofik; no öslipomöv soaliko in cemil saidik at, e ye, ävipom vemo mojedön guni de <Messina> e klotön oki me melanaklot oka, ävilom monafön e penön lü famül <Michelsen>, das ögekömomöv pos yel lafik. Ävilom gaenön moni so mödiki, das ökanom pelön debi oka.

Ye; - äbinos luspikot ! Äbinom yunik, läbik e pos düps nemödik öbinomöv lüson läbik konsulana !

E ye; - äseifom nogna; no demü konsulan, no demü daut, ab . . . binos neplidik, das no kanom matön dauti, nen das mot sukof !

Täno ägolom lü konsulan, fo yan kela vabs tel ästanons.

Äpedom nami söla <Michelsen> ed ägetom vini. Täno ägolom lü läds.

Tridöl da yan älilom luvokädi fibik ed älogom, das lefog fugöl vietikosa ädepubon ini cem nilikün. Älogom züo in sälun. Su cemaglun äseistons juks, stogs, heranads, niklots, heralain, e su tab äseiston mirafestun su boved ko sab luimik; äzogom dü timül, e poso ägolom lü tab, su kel boved ästanon, ed äbiegom oki love festun, e lips oma änilikons lü grün flifik.

Iglömom kofudami; lips omik pämufons äs in plek, kela vödis no änolom, ab kela tiks lefuliko äfulükons siämi stedälik e snatik oma. Nevilöfo igolom ini klän, ini kel te matan labom giti ad kömön. Giti at öjuitomöv ün soar, ab otüpo ba spels mödik ödepubonsöv.

Äplekom pro vomül yunik, jönik e löfik ut, keli nu älogom in siäm oka, ed ispelom igo, if klän övedon ome kösömik, das neai öperomöv lefuliko spelis jönik oka; id äplekom pro spel jönikün yunüpa oka, dö taked mana du juits e du neläb. E devod omik at, du kel vero äfünom mati oka pätupon fa jimatan konsulana.

Äkömof naföl da yan, peklotöl in satinagun yelovik, glufs violätik e rosad redikün in herem:

"Godö ! Stanol - li is ? No binos gidöfik ! Gam no mutom logön jigami büä okömof ini glüg."

E zu du klotam - "Is seiston verato stogs cila - e niklots ! Moflekolös oli ! Gode dani, das no ikömol, du vomül <Frandsen> äklotof ofi ko disagun - u gun. Kömolös nu! No kredolös, das espälobs. Mets teldeg de satinastof gudikün pro gun ! Efinükol - li festuni ? Fi ! verato ikredob, das no ol üdunol so ! Ab so ai mans kondötoms. Nos binos saludik omes. Finükön mirafestuni, büä kömons lomio oksik! A! binos so glumik. Daut löfik oba ! - Nu gololös ! - mutobs klotön jigami ola lefuliko !

E täno pämatirajanons, e täno ökömons lomio oksik, e täno öbinons matans.

Ed ävedos göd, ed ävedos soar - dels balid, telid e kilid. Käpten <Anton> äbinom in stad gluma e deva demü visits, noteds, smils valiks, e demü jonam alik cemas loma omik.

Dugäl käptena <Anton> pizögom, ab nat omik äbinon gudik; ädunom in lom okik, te pedugöl fa nat gudik oka. Ye äbinom man yunik - nämik e nobaladälik, kel balidna in lif älöfom vomi.

Pos vig bal äkömom glumiko lü konsulan bäldik in bür privatik atana.

Änoom, ven konsulan älofom ome zigari; ko glum äsagom konsulane, das daut omik no ai äbinof äs ösötof binön.

Söl bäldik <Michelsen> älumufom jotis:

"Vomaluspik! Älabob luspiki otik ko mot ofik, e ye äbinof viudan, ven ämat- ükob ofi. Ab stebedolös ! No binolös tu hitälik !"

"Binob leno hitälik !" äspikom <Anton>.

Konsulan älogedom lüsoni.

"No binol man ! In zif lölik no dabinom man, kel binom so stedälik äs ol. Te binol tu yilik, - ekö kod !"

"Ag ! . . . . "

"Binos luspik. Voms ai binofs voms. If no binofs gudiks, ven tölatoy ofis gudiko, täno . . . . no ! sagob no, das binos zesüdik, das tölatoy ofis badiko. Godö ! Ab fümäl binon zesüdik. Ün dels anik, vedolös semikna zunik; sagolös, das omonafol ünü vigs anik: e garanob, das matanil ola oyilof, ed ün tim okömöl obinof gudik ai. Ya binof cil gudik; ed if te dälof sukön klienis oka e no ai olilof moti oka . . . ab, no dälob sagön tu mödo, suemol obi fümo, no - li ? Nu edekötob tipi zigara. Plidolös ! filidolös oni e dunolös äs esagob !"

Pos dels anik söl <Anton> ägekömom ed äsagom smilölo:

"Eyufos, o lüfat "! Danö ! "

"Benovipob oli ! " söl bäldik äsagom.

Lelöfadels hitik no nog efegolons, ed äjinos äsif löf gretik neai idepubonöv.

Vütimo dugan vönik nafa ivedom saunik dönu; do iniludom, das dead isumonöv omi. Äbinos sekü atos, das <Anton> älüvom cali oka gaenätü om, kel lölo äbinom man skilik e dünavilik.

<Anton> ädesinom ad neai plonön. Ab - älabom cali nonik; igetom famüli, e famül oma iyufom omi ad mekön debi. Lio dunön - li ?

Öplidom nafani yunik ad dagetön dönu nafaduganacali vönik. Äbinom stimasukik; ab läb oma tefü nafam e läb oma tefü löf no ikodos, das ivedom pleidik; zu äbinos zesüdik, das änulüdom famüli oka.

Neläbiko naf, keli vöno idugom, imonafon dü tim nelunik lü Vesüda-Lindän, ed in pof no äbinon atimo naf gretikum.

Poso nafalaban äbegom omi ad kömön. Ägolom lü om, e ven ätridom da yan, älogom nafalabani, kel len tab ästanom ko telegram in nam okik:

"Binos - li verätik, das ematol ? " äsäkom nafalaban ko vög fefik.

"Lesi ! "

"Binos gölik ! Binol man yunik, e lüfat olik no okanom yufön vemo oli. Nolol - li atosi ? "

<Anton> äsagom nosi.

"Benö ! no tefos obi, ed alo binos tu lätik nu. Edugol nafi söla <Esbensen> beno e ko läb. Äbinol dugan skilik su naf obik. Egetob agödo telegrami at, ma kel naf obik seiston in pof <Falmouth>, bi mel ämosumon nafadugani ota. Pos medit anik, esludob ad lofön ole cali nafadugana edeidöl. Binol - li vilöfik ad lovesumön nafi, kel seiston in <Falmouth> ed us kälädön menodis anik ?"

<Anton> äsenom, das cügs äflamons, e fog äkömon foi logs omik.

Nafalaban älogedom omi, e täno äsagom ko vög votik :

"Etelegrafob sunädo nafadugane <Nielsen> ed i konsulane in <Falmouth>, dat baläd zesüdik okanon dunön. Binob kotenik, if onünol odelo obe gespiki ola, if täno okanol tävön me tren soaro. Adyö ! "

<Anton> äbinom legälik. Äspidom lomio okik ed in bun lebalik äbinom in fidacem. Ti ifalükom jidünani, kel ästeifülof ad klänedön lusmil dub simul süpädik.

Ävilom golön bei of, ab täno älogom logodi kofudik ofa.

"Kis ejenos - li ? " äsäkom nesufädiko.

"Läd binof so - so . . . . . . "

No stebedöl gespiki, ägolom ini sälun.

Us jimatan yunik äseatof su söf, fo kel vatabov ästanon su stul. Vom konsulana äseadof ed äluimükof kapaflanis dauta.

"Godö !" äluvokof lümot, ven ägolom ini cem. "No logol - li . . . . ? "

Mot zadik äjonof dauti, kel lenu älusputof mekädiko.

"Binol - li malädik ?" ävokom, ed ägolom lü of.

Vom konsulana ämojokof omi ko namamuf teatik.

"Kis binos - li ? Diabö ! Dalolös obi . . . kis ejenos - li ? " ävokom ko vög zunik.

Vom konsulana älöstanof. Älogedof lüsoni ed äsagof ko vög dibik e bisarik :

"Mans binoms ai nenoliks e bleiniks äs nek. O <Anton>, matan olik binof malädik, bi - bi okanol spetön ad vedön fat ! "

Täno el <Anton> äkienom näi söf ed äpedom nami vietik matana okik. Kid pedesinöl pästopon dub lusputam dönuik, e posä ägivom vati matane okik ed älilom pidis fenik ofa.

"O <Bolette> lelöfik oba ! " äsagom. "Äbinos vo süpäd läbik, no - li ? Ab kisi osagol, if ob i labob süpädi - nepespetöl ? "

Läd <Bolette> älogedof himatani oka ko logs säköl.

"Kis binos - li ? " äsagof takediko.

"O <Bolette> ! Binob käpten - odelo obinob käpten - odelo otävob ko naf obik ! "

Luvokäds tel - luvokäd pidabik bal se söf e luvokäd votik bal se stul voma konsulana. Jimatan malädik älöstanof, ägefalof sui söf, äluvokädof, älusputof, du mot äzisumof ofi ko brads oka äs jinim zisumof cili oka.

El <Anton> ästanom seilölö näi söf.

Äblufom ad nilikön nilü söf dönu ed äblufom ad spikön, ab luvokäds nulik äropons omi. Täno ägolom ini cemil oka ed is äprimom ad smokön pipi, kel ye päkvänikon suno.

Is äseadom dü tim anik ed ätikom dö nafanacemil oka in <pofasüt>, E ven vütimo ivedos stilik in näicem, ägolom dönu lü matan malädik oka.

Stad äbinon leigik. Daut äseatof paeliko su söf, e mot äseadof näi söf ed äluimükof kapaflanis dauta.

El <Anton> ägolom takediko lü söf. Älogedom lümoti.

"Benö ! lio stadof - li ?" äsäkom ko vög takedik.

"Takedö ! " äsagof vom konsulana. "Gololös nu e dabegolös pardi ofa ! "

Äblegükom oki love söf. Logs löfik ofa leblamöl e ye begöl, älogedons omi, e nam vietik ofa äseaton oki feniko in nam omik.

"No - li ? " äsagof. "Nu otävol - no ! . . . ."

___________________________________

Ün poszedel otik, el <Anton> äseadom in stebedalecem sanana gudikün in zif.

Sanan äbinom man visedik, kel ivobädom oke fami gretik.

"O <Anton> löfik oba, keliedükob oli ! In jenots somik, e pato balidna - jimatan olik no binof nämik. Binon - li täv olik vemo zesüdik ? Stebedolös ! Ebinol vo läbik. Natiko no vilob dekonsälön . . . ab okanos ba dämükön matani ola if otävol. Meditolös ! Okömob lü ol odelo !"

Ün del nilikün ästanom el <Anton> in bür nafalabana. Cigs oma no äbinons so rediks äs ün del büik.

"Benö ! Plidob obi ad logön oli, o söl <Anton>. Otävol - li asoaro ? "

"No, no - danob oli, ab . . . "

Nafalaban älogedom omi.

"Binob glumik demü ol, o <Anton>. Nu söl <Nielsen> otävom pla ol. Givolös obe telegramazöti. - Danö. Adyö ! "

Ün soar otik vom konsulana äsagof :

"Änolob, das no ämotävolöv. Atos ibinosöv verato badik, ven matan olik binof so malädik. Memob, das äliedob vemo, ven ägetob dauti löfik oba. E ven no laboy löfi matana oka . . . . Zu no mutol tölatön cili oba, äs jimatans nafanas votik patölatofs; matans ofa nafoms sunädo ün del pos matam. Söl <Michelsen> ekanom lifön is yufü kredit oka, e kludo id ol okanol dunön osi leigo. Söl käpten <Anton> fümiko okanom komön, ven cil balid oma pablunedon. Obinos tid smalik pro söls nafalabans ! "

"Dredob, das ovedos tid smalik i pro nafadugans ! " äsagom el <Anton>, kel äseadom su söf näi matan oka.

E söl <Anton> äliedom levemo, jüs motam ijenon. Badikünos äbinos, das äniludom, das motam öjenonöv ün del seimik; spikoy dö atos ai. E jimatan yunik äliedükof oki, e lümot äliedükof ofi in dajons jeikik, kels äjeikons binäli zadik, kel tadilo änedof yofami. Fino söl <Anton> äliedükom oki it - ab seilölo.

Zadöf e pidams valik flanü om äbinons vaniks; matan yunik oma äniludof, das äbinof vom lebalik in vol, kel iliedof so vemo, e mot ofa älabof niludi otik.

Zu älabom frädis mödik, ed ägaenom atimo moni nonik; ämekoy cilaklotis, e du nägam at klotilas, äsagof läd <Michelsen> ai :

"Godö ! spelob, das okanobs gebön klotis at, kelis nu nägobs . . . "

"Kisi niludol - li, o mot ?" äsäkof jimatan yunik ko vög yamöl.

"O cil misuemik oba ! " vom konsulana äseifom, e logs ofa ävedons luimiks.

E täno jimatan su söf ädrenof e jimatan len tab ädrenof, ed äspikoy dö dead e dö deadanöp, pla spikön dö lif e dö klädöm.

El <Anton> ädäsperom. No ävilom golön in süt, bi no ävilom kolkömön tedanis, keles ädebom moni, e ven dönu, ma konsäl sanana, äspatom ko lümot e ko matan, ägolom ai in dredäl.

Fino motöf äjenon.

No binon kovenik, pato no balidna. Vom liedof kösömo tu vemo; ab man i labom liedi oka demü livüp pemutöl oma, kel dasleiton ladi plu ka luvoks dasleitons lilis.

Ab lif binon fef gretik; mebobs atosi pötü motöf e pötü dead.

Motöf äjenon is nevifiko ab ye läbiko. E ven taked patik at ivedon in cem, taked at, keli men nonik okanon glömön, <Anton> ägolom ini slipacem, e ven äkienom näi bed, e ko devod äkidom nami vietik e sleniki, täno mot yunik äflekom logodi paelik oka lü om, e ko vög takedik äleblamof omi.

Nogna äpedom nami ofa, ägolom ini sälun, kiöp äseitom oki su söf ed ämürom :

"Binob ye so läbik !"

- - - - - - - - - - - - - - - - - - - - - - - - - - - - - - - - -

Valikos äblibos beno. Jimatan malädik älöstanof se bed ed äseadof lestiliko in stul gretik. Ab alna, ven pulil ädrenom, ätegof lilis oka yufü nams ed äpidof oki.

- Benö; mots yunik obas binofs nevafibiks. E kin binon - li kod ?

- Tim, tim, tim.

Ed onejafobs - li demü atos pianodis, tiedavati e kulivastidis ?

No.

Fino läd <Anton> äbinof saunik dönu. Täno pulil ävedom malädik. Äbinos zesüdik, das äbinom fibik; cilils valik binons fibiks, kludo id om äbinom fibik. Balido süg de mot, ab äkanof no sufön atosi, täno süg me miligaflad. Poso äblufoy miligamoti, kel ätifof, e täno miligamoti, kel äludrinof, e poso miligamoti, kel no äkanof sügön pulili. Fino ägeboy fladi dönu, e stomag pulila äbinon in stad lefulik nemögik.

Stomag malädik cilila frädon moni mödikum, ka man nepematöl okanom niludön. <Anton> älabom ai moni nonik, ab älabom pulili oka, e leno ävipom perön omi.

<Anton> ägolom lü sanan aldeliko. Sufäd sanana äsufom blufodi; ägespikom söle <Anton> ai so: "Läds olik no mutofs kudön so vemo ! Pulil binom saunik e nämik; nat okälon nati ! "

<Anton> älabom nu debi so gretik, das no änolom lio dunön.

E kilidna läb änokon su yan käptena <Anton>.

Nafalaban ävilom spikön ko om. Telegram nulik ikömon. Naf pidästuron ed äseaton nilü jol de <Farid>. Käpten <Nielsen> ibinom neläbik. Nafalaban nu älofom söle <Anton> cäli as käpten.

<Anton> ägekömom lü lom lönik; atna äbinom vutik demü leläb. Lümot isegolof; änünom jimatane okik jenoti läbik e sludi oka. Trök omik äsötom papäkön !

Äjedof oki drenöl love klädöm:

"Lio kanol - li motävön, lio kanol - li lüvön omi ? Logolös, labom logodi so keliedik ! No, binos verätik, kelosi mot ai sagof . . . .. ! "

Äseitom nami oka sui jot ofik.

"<Bolette> ! " äsagom. "Kredob, das mot olik edunof vemo negitiko is in lom; esumof ladi ola obe, e ti esumof dilili lada obik dämü ol. Kanob ti sagön : Gode dani - ibä nu kanob dunön äs man siämöfik. Pulili us löfob levemo; löfob omi plu ka ol, mot omik, löfol omi. Ab binos ebo demü om, das dunob nu. Ponosükobs, if no odunob nu; nolol atosi, ab binol cil e pardob oli. Nu tävob ko potavab e pos düps tel okanob binön in <Frerup>, kiöp lezug stebon. If ojenos, das pulil ovedom - la vemo malädik, kanol telegrafön. Sagolös täno, das sötob kömön, ed okömob. Nolol, das tefos läbi obas. No nogna vilob sagön, das deb obsik binon legretik. Binolös stanälik; kredob, das obinob läbik e - no espikob neverätiko. Kidolös obi ed adyö ! "

Täno äblegom oki love pulil, kel äluvokom demü stomägadols.

Lips fata äsagons vödis anik sone; e poso fat ämogolom.

Pos tim nemödik, vom konsulana äkömof ed älogof jimatani yunik, kel äseatof drenöl su söf.

Ven tep kolkömon meli, binos dramat jeikik, ab ye jönik. Ven lümot zunik segifof tepi senas okik love mel lada, i binos dramat jeikik, ab no so jönik.

Vom konsulana äbinof zunik: Äbinom men nedanik, nemen, fat nenatik, kel ämogolom de cil vemo malädik e de matan vemo fibik. Ab kiöpao ikömom ? Ikömom se miot; äbinom bapan, son feilana seimik, groban, keli famül stimik ilensumon . . . . . . .

Läd <Bolette> äblufof ad stopön vödaleflumi; äjemof. Ab nu mot äslänof dauti; e fino voms bofik ädrenofs, e balan äpidof votikani.

Pulil äbinom netakedik; lulit äprimon. Vom konsulana äsedof sunädo jidünani lü sanan, ab atan ägespikom, das bi ixamom cilili agödo e no ituvom kodi dremäla, e bi te älabom timi nemödik, no ävilom kömön bü ogödel, if cil no ävedom vemo malädik.

Vom konsulana äslänof dönu. Sanan i äbinom nemen e bapan; äbinos natiko, bi no nog igetom peloti oka, das no ävilom kömön ! E dönu ädrenofs, e balan äpidof votikani.

Nu älesagof daut, kel igalof dü neit lölik, das kap okik äbinon vemo malädik, e das äbinos zesüdik, das ätakedof oki. Ab mot, kel igalof dü neit büik, älesagof, das äbinos kap okik, kel äbinon vemo malädik, e das äbinos zesüdik, das of ätakedof oki; e täno vom konsulana äseitof futis oka sui söf, kusen dis bäk okik e tapäd love gun okik, ed äyilof feniko lo nämäd slipa.

Läd <Bolette> ko kapaflans noköl äseadof len klädöm. Ifilidof lampadi, ipladof oti sui tab, ed ipladof tegedi grünik love on. Lunid grünik äfalon love pulil, kel ai äbinom netakedik; äluvokom ed ädrenom semanaedo. Mot äsumof fladi, äsmekof miligi ed ägegivof oni ome. Äfinikof dis om. Äbinom luimik, ab so äbinom ai. Äluvokom dönu.

Vom konsulana ätovof kapi oka e ko vög zunik äsäkof, kis ejenos.

"Godö !" mot yunik äsagof. "Pulil neai ebinom so malädik äs nu. Kredob . . . . . !"

"Lesi !" vom konsulana äsagof slipiko.

"O mot ! niludol - li, das binos zesüdik, das telegrafob. If nu . . . . . .

"Natiko !" mot ämurof. "Pladolös klädömi len ob, ed oklädob, du golol lü telegrafabur. O God kipedomös obis !"

Daut äpladof klädömi nilü nam motik, kel sunädo äprimon ad klädön. Täno daut ägolof, e nog dü sekuns anik äkanon nam mota klädön. Poso nam äfalon, tän fut bal voma konsulana, sodas lainastog yelovik äpubon love juk braunik. Mud äbinon maifik, e se ot äkömons tons naudik. Dranädan foginik seimik ilesagomöv töbo, das äbinos vom konsulana Fransänik, kel äseatof is.

Läd <Anton> ästanof in cemil nabik telegrafabüra, kel pädaliton fa lampad. Nam ofik ädremon ven äsumof telegramazöti. Lut us äbinon lejeikik, ed us po litöp äseadom potacalan stenik ed i telegrafan so fefik e nemufik äs Fät it.

Binos ai bisarikos in telegrafabürs valik, igo in zifil smalikün. Burans ai nestimoms luti flifik ed ai hetoms litöpik maifik. Lusmel bisarik ai dabinon in bür somik. E zu liloy eli tik-tik, tik-tik laidik, kel kanon sinifön so mödo u so nemödo, ab suvo sinifon lifi u deadi !

Läd <Bolette> äsumof spidiko peni ed äpenof vödis anik.

No, ävedonöv tu lunik ed äfrädonöv tu mödo. Telegramazöt nulik.

Nu telegram ävedon saido brefik, ab äbinos tonatapök. No daloy votükön depadi nen jonön oti telegrafane, e leno ävipof spikön ko Fät.

Telegramazöt dönu.

Äseatof kapi oka in nams e nivifiko äprimof ad penön. Lunid lampada äfalon love matalin ofa. Älogedof glumiko oni. No, - no äkanof penön. Äseifof e dub atos äslugof bosi luta badik in cemil; äbinof malädik; äbinos zesüdik ad golön plödio. Cems omik ! Balidna ätikof so. E cems at äsötons papelön, e kim äpelomöv onis, if no om äkanom ? . . . . .

Lut äbinon raodik, ab no äbinos vien, e löpo su sil, stels takedik ästelons da lefogs gedablövik. Ätikof, das stom, if te äbinon laidik, äbinonöv gönik pro täv söla <Anton> - e täno - äbinom käpten !

Lad ofik änokon nämiko. Ävilof nu golön lomio; ävilof stanälön; äbinos blig ofik. Ämeditof vödis badik ut, kelis mot ofik isagof tefü om in cems omik !

Nu äbinof in lom.

Pulil äseatom drenöl in klädöm. Mot äslipof. Läd <Bolette> äbinof vom zadik, ab jibinans zadik ai labofs senälis somik zadik; pajekofs ai fa grob - ven kanofs küpedön oti.

Älogedof moti oka seatöli us su bäk in seat nejönik; mud ofik äbinon maifik, ed älabof froni nejönik bevü cüg e cün.

Fi, äbinof verato hetöfik - e badugik !

Daut ti ävedof dredik. Äjedof tapädi love mot slipöl ed äspidof lü pulil. Äkidof omi ed ävedom takedikum. Täno äseatof su bed.

Äprimof ad slipön, ab töbo ifärmükof logis oka, ven äjinof, das pulil ädrenom vemo. Lesi ! Älöstanof, äkipof lampadi love pulil, kel älesputom ed äluvokom laidiko, e kela logod äbinon pesvelöl, cügs oma äbinons paeliks, logs smalik äbinons feniks.

Äluvokof, ägolof lü mot, ägalükof ofi ed ägolof lü telegrafabür, kel pädaliton ai fa lampad badik. Su telegramazöt äpenof spidiko : <Kömolös sunädo, pulil odeadom suno.> Ägivof zöti söle Fät, kel äsumom oti, änumom vödis, äpenom bosi ed ägegivof moni anik.

Äkikom litöpili dönu. Älogof, das Fät ägolom lü telegrafablimot; älilof : tik-tik, tik-tik ! - Nu telegram pisedon ele <Anton>.

Poso ägolof lomio.

Vom konsulana äseadof su söf, stilüköl pulili su blöt okik e klädölo omi lunomiko. Äluvokädom äsif äbinom fopik. Läd <Anton > äseitof pulili in klädöm, ed äluvokädom nemödikumo. Dönu ävedom netakedik, e dönu ävedom takedikum; äslipoy nemödo, ägaloy, no äspikoy; neit ämogolon.

Ogödo pulil äslipom gudiko. Soaro hiel <Anton> äkömom da yan.

Äbinom vemo paelik. Äsagom nosi, ab ägolom sunädo lü klädöm ed ämosumom bedastofedi, kel piseaton as jel ta delalunid.

Nu äbinof in lom.

Pulil äseatom drenöl in klädöm. Mot äslipof. Läd <Bolette> äbinof vom zadik, ab jibinans zadik ai labofs senälis somik zadik; pajekofs ai fa grob - ven kanofs küpedön oti.

Älogedof moti oka seatöli us su bäk in seat nejönik; mud ofik äbinon maifik, ed älabof froni nejönik bevü cüg e cün.

Fi, äbinof verato hetöfik - e badugik !

Daut ti ävedof dredik. Äjedof tapädi love mot slipöl ed äspidof lü pulil. Äkidof omi ed ävedom takedikum. Täno äseatof su bed.

Äprimof ad slipön, ab töbo ifärmükof logis oka, ven äjinof, das pulil ädrenom vemo. Lesi ! Älöstanof, äkipof lampadi love pulil, kel älesputom ed äluvokom laidiko, e kela logod äbinon pesvelöl, cügs oma äbinons paeliks, logs smalik äbinons feniks.

Äluvokof, ägolof lü mot, ägalükof ofi ed ägolof lü telegrafabür, kel pädaliton ai fa lampad badik. Su telegramazöt äpenof spidiko : <Kömolös sunädo, pulil odeadom suno.> Ägivof zöti söle Fät, kel äsumom oti, änumom vödis, äpenom bosi ed ägegivof moni anik.

Äkikom litöpili dönu. Älogof, das Fät ägolom lü telegrafablimot; älilof : tik-tik, tik-tik ! - Nu telegram pisedon ele <Anton>.

Poso ägolof lomio.

Vom konsulana äseadof su söf, stilüköl pulili su blöt okik e klädölo omi lunomiko. Äluvokädom äsif äbinom fopik. Läd <Anton > äseitof pulili in klädöm, ed äluvokädom nemödikumo. Dönu ävedom netakedik, e dönu ävedom takedikum; äslipoy nemödo, ägaloy, no äspikoy; neit ämogolon.

Ogödo pulil äslipom gudiko. Soaro hiel <Anton> äkömom da yan.

Äbinom vemo paelik. Äsagom nosi, ab ägolom sunädo lü klädöm ed ämosumom bedastofedi, kel piseaton as jel ta delalunid.

Pulil äseatom lestiliko.

"Binom - li deadik ?" fat ämürom.

"No, no !" jimatan ävokof. "Slipom. Äkredob - pardolös obi, ab aneito - ag ! no nolol - äbinob so dredälik !"

Hiel <Anton> äseadom su stul e ko nams ätegom logodi oka.

Äseifom, älöstanom, ed ägolom se cem.

Ün soar, ven äkömom lomio se nafanaklub, äbinom brietik.

Ven ätridom ini cem, äprimom ad kanitön; täno äsumom pulili se klädöm, äkidom omi, eseitom omi in klädöm dönu; äsäklotom oki, äseadom su bedasim, äsmilom kleiliko e fino ädrenom.

Ün del sököl, ädabegom pardi, e matan e jimatan äbedons göliko ün soar at.

Täno tedans äsedoms kalotis. Hiel <Anton> ävedom zunik, äbegom omis sumön domömi lölik ed i lümoti, keli älublamom, bi ävilof spikön ko <Bolette> - e fino ägolom se lom ad dagetön cali as kvisinan in nafil seimik.

Soaro päsükom in lom fa nafanakompenans büik tel. Älefalom sui cemaglun ed älusputom.

Ün del balidkömöl äbinom malädik, äblibom in bed, ägetom medini, ädabegom pardi ed äpidom fäti oka.

Somo vig bal äpaseton. Lümot no äkömof ini lom, ed äjinos äsif atos ästilükos siämi zunik söla <Anton>.

Äsagom nu fefiko, das ävilom golön lü lezif ad dagetön cali as nafadugan, ab kludo äbinos zesüdik, das äselom domömi lölik oka e jimatan e cilil äsötons lödön in cemil vönik oma in pofasüt. Jimatan omik ivedof nenpükik e dredälik; ye äklienof ad taspikön nemödo, ab ävedom zunik, älublamom ofi, ed - ägleipom ofi me jot ed äjoikom ofi mo.

Älefalof sui glun ed älilom luvoki smalik.

Ab älilof luvoki vemo kleilikum demü däspär e demü lepid, ed äjedom oki love of, ätovom ofi ed äseitom ofi su bed . . . . . . .

Ämaifof logis oka. At, luvok matana ofik, ätonom nog in cem. Ab bed äbinon vagik; e lampad äliton, e pulil äseatom takediko in klödöm okik, e se sälun älilof seifami mota.

"Kludo edrimob ! Gode dani !! Ab depad - li ? telegram ? No etelegrafob, edrimob. Nogna: Gode dani !!

E läd <Bolette Anton> älogedof ko leläb pulili, e drens äkömons ini logs ofik. Älogedof särvigi smalik, kel vo no äbinon slenik. Sten redik bal - no tel. Ävedof dredälik. Ab süpo - binof mot e sevof kludo difikosi - süpo säklotof pulili ed älogedof joti e bäki oma.

"Pulil löfik oba ! elabol - li doli ?"

In vol at tuvoy nimilis blägik - u sevabo: flibis - igo in doms klinikün.

Täno jimatan käptena <Anton> ägolof ini sälun, äseadof len tab, äfilidof lampadi, äsumof papüri, peni e nigi, ed äpenof penedi vemo lunik matane okik.

Daloy - li logön ? No. Utos, kelosi jimatans yunik penofs matanes okik - e patiko utos, kelosi daut konsulana äpenof matane okik ün soar at, no daloy reidön.

Ab ven lätikumo ifinükof penedi ed älöstanof ad dakipön penedi jüs göd balidkömöl, älogof söfi, kiöp vom konsulana äseatof.

Daut älogedof moti. Äkanoy suemön logedi : O mot ! Nu sötol lüvön obi. Alo: te balna a vig vilob spikön ko ol !

E täno ägolof ini slipacem.

Vigs tel pos jenot at käpten <Anton> ädugom nafi oka ini pof.