Reided 10
Back ] Up ]

 

 

YELASÄSUNS

Yel padilädon in säsuns fol: florüp, hitüp, fluküp e nifüp.

Ün florüp nat galikon se nifüpaslip lunik oka. Sol svieton aldeliko ai vamikumo. Gnobs svelikons len bims e bimüls svelikons, e bledem spröton, flifiko e grüniko. Yebaläns e bäläts i primons ad grünikön. Tävaböds geflitons se sulüdän; lieloy kanitön e tyilpön onis valöpo. Plaudoy e sovoy su feilaläneds, e gads fulikons me florüpaflors. Sil binon blövik e nen lefogs.

Täno hitüp kömon. Sol löpikon ai geilikumo e vedos vamikum. Juls finidons vobi oksik, e famüls mödik setevons lü vilads e länädadoms oksiks in länäd. Yunul binon tim neitas litik. Pos zehitüp tim jäfädik primon pro feilan. Balido sigayebamatim kömon, e väp sigayeba änu pefodöla fulükon luti. Vüo gren madikon, pafodon e paveigon ini baraks.

Poso dels vedons brefikums e neits koldüliks. Ün göds yeb luimon dub dav e semikna fogs vebons sus yebaläns. Bledem bimas vedon yelovik, braunik e redik, e fino bleds doniofalons sui glun. Binos fluküp, e nifüp ya nilikon. Bäls alsotik e fluks madikons nu. In fots plökoy e vaxenis e redavaxenis.

Fino labobs is nifüpi ko kold e flod. Suno nif falon e su laks e mels glad dabinon. Bims binons nenblediks; sil binon gedik e fogik. Suvo su vegs nifakums geilik dabinons. E too nifüpadel in länäd kanon binön milagiko flifädüköl pro koap e lan.

- - - - - - - - - - - - - - - - - - - - - - - - - -

 

 

bäl

a berry

luimön

to be wet

bälät

a meadow

madikön

to ripen

barak

a barn

nifakum

a snowdrift

bimül

a bush

redavaxen

a cranberry

dav

dew

sigayeb

hay

dilädön

to divide

sprötön

to sprout

finidön

to finish

svietön

to shine

flifädüköl

refreshing

tävaböd

a migratory bird

fodön

to mow

tyilpön

to chirp

gnob

a bud

vaxen

a bilberry

jäfädik

busy

vilad

a villa

lan

(the) soul

zehitüp

midsummer